ავტორიზაცია
„Happy Onlife“
26 აგვ. 2019
58 ნახვა
„Happy Onlife“

ევროკავშირის 8 ქვეყანაში წარმატებულ პროექტად აღიარებული ონლაინ აპლიკაცია და სამაგიდო თამაში მოზარდებისთვის, - დაწყებითი და უფროსი კლასის მოსწავლეებისთვის. პროექტის მიზანია, ბავშვებმა თამაშით ისწავლონ ციფრული მედიის უსაფრთხო და პასუხისმგებლიანი გამოყენება, ონლაინ კონტენტის კრიტიკული შეფასება და ანალიზი. ამასთან ერთად, Happy Onlife ხელს უწყობს მშობლებსა და მასწავლებლებს, აქტიურად იზრუნონ მოსწავლეების მედიაწიგნიერების უნარ-ჩვევების განვითარებაზე და დაიცვან ისინი კიბერბულინგისგან.

Happy Onlife, რომელიც მედიაწიგნიერებასთან დაკავშირებულ ერთ-ერთ ყველაზე ეფექტიან პროექტად არის მიჩნეული, ადაპტირებული და ხელმისაწვდომია ევროპის 9 ენაზე. კომუნიკაციების კომისიამ შექმნა აპლიკაციის ქართული ვერსია, რომელიც მოზარდების ყურადღების ცენტრში მალევე მოექცა, რაც მათი მაღალი ჩართულობით დასტურდება.

გარდა ონლაინ აპლიკაციისა, კომუნიკაციების კომისიამ ქართულ ენაზე შექმნა Happy Onlife-ის სამაგიდო თამაში და განათლების სამინისტროსთან თანამშრომლობით, საქართველოს სკოლებში შეიტანა.

აპლიკაციისა და სამაგიდო თამაშის სწორი გამოყენების შესახებ ტრენინგები კომისიის მედიაწიგნიერების დეპარტამენის წარმომადგენლებმა საქართველოს სკოლების დაახლოებით 700 მოსწავლეს ჩაუტარეს. აპლიკაცია დაახლოებით 7000-მა მომხმარებელმა ჩამოტვირთა.

2020 წლის ბოლომდე Happy Onlife პლატფორმა განახლდება და მას 150 ახალი კითხვა ქართულ ენაზე დაემატა. მზარდი მოთხოვნიდან გამომდინარე, შეიქმნება სასწავლო გზამკვლევი და ტრენინგები საქართველოს 100-ზე მეტი სკოლის მასწავლებლისთვის, მოსწავლისა და მშობლისთვის  ჩატარდება. 

აპლიკაციის ჩამოტვირთვა შესაძლებელია, როგორც აიოსზე, ასევე ანდროიდზე, თუმცა გარდა ამისა შესაძლებელია დესკტოპ ვერსიის თამაშიც.