მსოფლიო ეკონომიკურმა ფორუმმა (World Economic Forum) გლობალური საფრთხეების წლიური ანგარიში გამოაქვეყნა, სადაც დეზინფორმაცია და მისინფორმაცია მთავარ გამოწვევებს შორისაა დასახელებული. დოკუმენტი კიდევ ერთხელ ადასტურებს, რომ ციფრული ტექნოლოგიების განვითარების ფონზე, მცდარი ინფორმაციის გავრცელება და მისი გავლენა მნიშვნელოვნად გაიზარდა. ანგარიშის მომზადების პროცესში 900-ზე მეტი საერთაშორისო ექსპერტი იყო ჩართული, რაც მონაცემების მრავალმხრივ ანალიზს უზრუნველყოფს და შესაძლებლობას იძლევა, უფრო კომპლექსურად შეფასდეს აღნიშნული საფრთხეების მასშტაბები.

დოკუმენტის მიხედვით, მომდევნო 2 წლის განმავლობაში, 33 გლობალურ საფრთხეს შორის დეზინფორმაცია და მისინფორმაცია პირველ ადგილს დაიკავებენ, ხოლო 10 წლის პერსპექტივაში, ისინი მეხუთე ადგილზე გადაინაცვლებენ. ეს მიანიშნებს, რომ მიუხედავად გრძელვადიანი ტენდენციების ცვლილებისა, მცდარი ინფორმაციის გავრცელება კვლავ ერთ-ერთ მნიშვნელოვან გამოწვევად დარჩება.

ანგარიშის მიხედვით, დეზინფორმაცია და მისინფორმაცია ყველაზე რელევანტური გამოწვევა იმ 30 წლამდე ახალგაზრდებისთვის არის, რომლებიც ყველაზე ხშირად მოიხმარენ ციფრულ მედიას. 40-70 წლის ასაკის ადამიანებში ეს პრობლემა ნაკლებად საყურადღებოა, თუმცა, ის მაინც ახდენს გავლენას მათ ინფორმირებულ არჩევანზე. ყველაზე ნაკლებ რელევანტურად კი, საკითხი 70 წელს გადაცილებულ პირებში აღიქმება. ამის გარდა, გამოკითხულთა 40%-მა განაცხადა, რომ ენდობა ახალი ამბების წყაროებს, რაც მიუთითებს, რომ საზოგადოების გარკვეული ნაწილი კვლავ საჭიროებს ინფორმაციის წყაროების შეფასების უნარის გაუმჯობესებას.

საგულისხმოა, რომ გამოკითხულთა 85%-მა განათლება და ცნობიერების ამაღლება, განსაკუთრებით ციფრული წიგნიერების მიმართულებით, დაასახელა მთავარ გრძელვადიან საშუალებებად დეზინფორმაციისა და მისინფორმაციის გავლენის შემცირებისა და საზოგადოებრივი მედეგობის გასაძლიერებლად. ეს კიდევ ერთხელ ადასტურებს მედია და ციფრული წიგნიერების, ფაქტების გადამოწმებისა და კრიტიკული აზროვნების უნარების მნიშვნელობას, რომლებიც ადამიანებს ეხმარება სანდო და მცდარი ინფორმაციის გამიჯვნაში და ინფორმირებული გადაწყვეტილებების მიღებაში.

ანგარიშის სრული ვერსია ხელმისაწვდომია ბმულზე: https://www.weforum.org/publications/global-risks-report-2025/