თანამედროვე საგანმანათლებლო სივრცეში გენერაციული ხელოვნური ინტელექტის (AI) ტექნოლოგიები სულ უფრო მნიშვნელოვან როლს თამაშობენ. ეს ინოვაციური ინსტრუმენტები მასწავლებლებს, მკვლევრებს და საგანმანათლებლო დაწესებულებებს საშუალებას აძლევენ შექმნან მრავალფეროვანი, პერსონალიზებული და ინტერაქტიული სასწავლო რესურსები.

ქვემოთ მიმოხილულია გენერაციული AI-ის შესაძლებლობები განათლების სფეროში, განსაკუთრებით ვიზუალიზაციის კუთხით, ვინაიდან ის მნიშვნელოვანი ელემენტია სწავლების პროცესში რთული კონცეფციებისა და მოვლენების ახსნის დროს.  

ვიზუალური მასალების შექმნა 
Midjourney და DALL-E საშუალებას აძლევს მასწავლებლებს შექმნან თემატური ილუსტრაციები, ანატომიური დიაგრამები, ისტორიული სცენების ვიზუალიზაცია, ინტერაქტიული რუკები და გრაფიკები.

საპრეზენტაციო მასალების შექმნა
Canva და Genially მარტივად გამოსაყენებელი პლატფორმებია, რომლებიც ავტომატურად ქმნიან პროფესიულ პრეზენტაციებს, ახდენენ ინფოგრაფიკებისა და დიაგრამების გენერირებას, ქმნიან ინტერაქტიულ სასწავლო პოსტერებს და ამზადებენ სხვადასხვა ვიზუალურ სასწავლო მასალებს.

ინტერაქტიული შეფასება
Kahoot! და Quillionz მასწავლებლებს ეხმარება შექმნან ტესტები და ქვიზები მრავალფეროვანი კითხვებით, ავტომატურად დაამუშაონ მოსწავლეთა პასუხები, მოამზადონ ანალიტიკა და განავითარონ პერსონალიზებული შეფასების სისტემები.

ვიდეო მასალის გენერირება
Synthesia და D-ID ვირტუალური მასწავლებლების შექმნის შესაძლებლობას იძლევა, რომლებიც სხვადასხვა ენებზე გადასცემენ სასწავლო მასალას, ამზადებენ მიკრო-ლექციებს კონკრეტული თემების შესახებ, ანიმაციის მეშვეობით ახდენენ რთული პროცესებისა და მოვლენების ვიზუალიზაციას და ქმნიან ინტერაქტიულ შეფასების სისტემებს.

ტექსტური ინფორმაციის გენერირება
Claude და ChatGPT  სხვადასხვა საგნობრივი მიმართულებით გამოიყენება, მათ შორის პერსონალიზებული სასწავლო მასალების, ინტერაქტიული სავარჯიშოების და ქვიზების შექმნის, საგამოცდო კითხვების მომზადების, ასევე, კვლევითი პროექტების იდეების და სტრუქტურის ფორმირებისთვის.

გენერაციული AI პლატფორმები მნიშვნელოვნად ცვლიან ციფრული საგანმანათლებლო რესურსების შექმნის ლანდშაფტს. მათი გამოყენება შესაძლებლობას აძლევს განათლების სფეროს სპეციალისტებს სასწავლო მასალების შექმნისთვის გამოყოფილი დრო სწავლების ხარისხის გაუმჯობესებას და მოსწავლეებთან ურთიერთობას დაუთმონ. თუმცა, მნიშვნელოვანია გვახსოვდეს, რომ ზემოაღნიშნული ტექნოლოგიები უნდა აღვიქვათ, როგორც დამხმარე ინსტრუმენტები და არა მასწავლებლების ჩამნაცვლებლები. ოპტიმალური სასწავლო შედეგი მიიღწევა მაშინ, როდესაც ადამიანური გამოცდილება AI-ის შესაძლებლობებს ერწყმის და უფრო ეფექტურ, ინკლუზიურ და საინტერესო საგანმანათლებლო პროცესს ქმნის. ამასთან, AI-ის პოტენციალის მიუხედავად, არსებობს მნიშვნელოვანი გამოწვევები და ეთიკური საკითხები, როგორიცაა შინაარსის/ვიზუალიზაციის სიზუსტე და ხარისხი, შექმნილი მასალების ინკლუზიურობა და მასწავლებლისთვის მიკერძოებული ტექსტური/აუდიოვიზუალური მასალის მიწოდება. შესაბამისად, აუცილებელია, რომ მასწავლებლებმა ყოველთვის გადაამოწმონ AI-ის მიერ მიწოდებული ნებისმიერი სახის მასალა, სანამ მას მოსწავლეებთან გაზიარებენ.

წყარო:
https://onlinedegrees.sandiego.edu/artificial-intelligence-education/