ავტორიზაცია
კომუნიკაციების კომისიამ მედიაწიგნიერების კვირეული პარტნიორებთან ერთად კონფერენციით გახსნა
25 ოქტ. 2021
893 ნახვა
მედიაწიგნიერების კვირეული

მედიაწიგნიერების კვირეული კომუნიკაციების კომისიამ განათლებისა და მეცნიერების სამინისტროსა და მასწავლებელთა პროფესიული განვითარების ეროვნულ ცენტრთან ერთად ორდღიანი კონფერენციით გახსნა. კონფერენციაში მონაწილეობა კომუნიკაციების კომისიის წევრმა ნათია კუკულაძემ, განათლებისა და მეცნიერების მინისტრმა მიხეილ ჩხენკელმა,  საერთაშორისო და ადგილობრივი ორგანიზაციების წარმომადგენლებმა, მათ შორის საქართველოში ევროკავშირის ელჩმა, გაეროს ბავშვთა ფონდის წარმომადგენელმა, საქართველოში ა.შ.შ.-ის საელჩოს კულტურის ატაშემ და საქართველოში ბრიტანეთის საბჭოს დირექტორმა მიიღეს. კონფერენციას ასევე მედიაწიგნიერების სამიზნე ჯგუფები, სკოლის მოსწავლეები, სტუდენტები, პედაგოგები და მშობლები ესწრებოდნენ.

კონფერენციის მიზანი საქართველოში მედიაწიგნიერების მიმართულებით არსებული გამოწვევების განხილვა იყო. კონფერენციის ფარგლებში, პარტნიორებმა საქართველოში მედიაწიგნიერების კუთხით განხორციელებული საქმიანობა შეაჯამეს და სამომავლო გეგმები განიხილეს. ექსპერტებმა მედიაწიგნიერების საჭიროებებისა და როლის შესახებ ისაუბრეს და აქცენტი ისეთ აქტუალურ საკითხებზე გააკეთეს, როგორებიცაა დეზინფორმაცია, უსაფრთხო ინტერნეტი, სიტყვის თავისუფლება და მედიის მიუკერძოებლობის სტანდარტები.

შეგახსენებთ, რომ კომუნიკაციების კომისიის, როგორც საქართველოში მედიაწიგნიერების პოლიტიკის განმსაზღვრელი სახელმწიფო უწყების ორგანიზებით, საქართველოში 25-29 ოქტომბერს მედიაწიგნიერების კვირეული ტარდება. გაეროს გენერალურმა ასამბლეამ, 2021 წლის 25 მარტს 75-ე სესიის ფარგლებში, მედიისა და ინფორმაციული წიგნიერების გლობალური კვირეულის შესახებ რეზოლუცია მიიღო, რომლის თანაინიციატორიც საქართველოა. რეზოლუციის თანახმად, მედიისა და ინფორმაციული წიგნიერების გლობალური კვირეული ყოველი წლის ოქტომბრის ბოლო კვირას ჩატარდება.